ஒரு மாவட்டம் ஒரு பொருள்

இந்தியாவின் ஒவ்வொரு மாவட்டத்தையும் ஏற்றுமதி மையமாக மாற்றும் திட்டத்தினை 2019 விடுதலைத் திருநாளன்று மாண்புமிகு பாரதப் பிரதமர் அறிவித்தார். வாணிகம் மற்றும் தொழில்துறை அமைச்சகம் வெளிநாட்டு வாணிக இயக்குநரகம் (DGFT) மூலம் மாநிலங்கள்/ ஒன்றிய ஆளுகைப் பகுதி அரசுகளுடன் இணைந்து ஒவ்வொரு மாநிலம்/ஒன்றிய ஆளுகைப் பகுதியில் உள்ள ஒவ்வொரு மாவட்டத்திற்கும் தனித்துவமான ஒரு மாவட்ட ஏற்றுமதி திட்டத்தைத் (DEP) தயாரித்து செயல்படுத்தி வருகிறது.

தமிழ்நாடு அரசு மாவட்ட ஏற்றுமதித் திட்டத்தைச் செயல்படுத்த மாவட்ட ஆட்சியர் தலைமையில் வெளிநாட்டு வாணிக கூடுதல் இயக்குநரைக் கூடுதல் தலைவராகவும் மாவட்டத் தொழில் மையப் பொது மேலாளர், மாவட்ட முன்னோடி வங்கி மேலாளர், ஏற்றுமதி மேம்பாட்டுக் குழுக்கள் மற்றும் அரசுத்துறை பிரதிநிதிகள் ஆகியோரை உறுப்பினர்களாகவும் கொண்ட மாவட்ட ஏற்றுமதி மேம்பாட்டுக் குழுவை (DEPC) அமைக்க 23/01/2020 & 16/03/2020 தேதியிட்ட ஆணைகளில் ஆணையிட்டுள்ளது.

மாவட்ட ஏற்றுமதித் திட்டத்தின் ஒரு பகுதியாக ஒவ்வொரு மாவட்டத்துக்கும் தனித்துவமான ஒரு பொருள் கண்டறியப்பட்டுள்ளது. மாவட்ட ஏற்றுமதி மேம்பாட்டுக் குழு, அந்தக் குறிப்பிட்ட பொருளுடன் தொடர்புடைய தொழில் நிறுவனங்கள் எதிர்கொள்ளும் சிக்கல்களைத் தீர்க்கவும் அவற்றுக்குத் தேவைப்படும் வசதிகளை வழங்குவதற்குமான ஒரு நிலையான பொறிமுறையை அமைக்க முயலும்.